tarikiyon mein dekhta hun roz KHun-e-KHwab

tārīkiyoñ meñ dekhtā huuñ roz ḳhūn-e-ḳhvāb

shab ko sahārā detā shikasta sutūn-e-ḳhvāb

har aañkh ke liye nahīñ hotī sukūñ kī niiñd

har niiñd ke liye nahīñ hotā sukūn-e-ḳhāb

apnī ḳhushī meñ kis ko batā.ūñ ki in dinoñ

ik shaḳhs aa ke miltā hai mujh ko darūn-e-ḳhvāb

parvāz dekhtā thā hamārī sitāra-sāz

ham ko ga.e dinoñ meñ bahut thā junūn-e-ḳhvāb

manzar meñ aañkh khulte hī bhar jaatā hai sukūt

ḳhauf-o-hirās kī vo fazā hai barūn-e-ḳhvāb

tarikiyon mein dekhta hun roz KHun-e-KHwab

shab ko sahaara deta shikasta sutun-e-KHwab

har aankh ke liye nahin hoti sukun ki nind

har nind ke liye nahin hota sukun-e-KHab

apni KHushi mein kis ko bataun ki in dinon

ek shaKHs aa ke milta hai mujh ko darun-e-KHwab

parwaz dekhta tha hamari sitara-saz

hum ko gae dinon mein bahut tha junun-e-KHwab

manzar mein aankh khulte hi bhar jata hai sukut

KHauf-o-hiras ki wo faza hai barun-e-KHwab