tasir-e-muKHtalif ki rawani se jal gae

tāsīr-e-muḳhtalif kī ravānī se jal ga.e

sūraj ke hoñTh barf ke paanī se jal ga.e

lafzoñ kī sīḌhiyoñ se utarte hue ḳhayāl

kāġhaz pe aa ke soz-e-ma.ānī se jal ga.e

ab sub.h shaam kījiye paanī kī paTTiyāñ

sahrā hamārī tishna-dahānī se jal ga.e

us sher ke thā misra.a-e-avval meñ zikr-e-āb

naqqād jis ke misra-e-sānī se jal ga.e

kuchh log ḳhaak ho ga.e hijrat kī aag se

kuchh log shauq-e-naql-e-makānī se jal ga.e

āvāz ke daraḳht kā me.aar kyā girā

hoñToñ ke phuul talḳh-bayānī se jal ga.e

tasir-e-muKHtalif ki rawani se jal gae

suraj ke honTh barf ke pani se jal gae

lafzon ki siDhiyon se utarte hue KHayal

kaghaz pe aa ke soz-e-maani se jal gae

ab subh sham kijiye pani ki paTTiyan

sahra hamari tishna-dahani se jal gae

us sher ke tha misra-e-awwal mein zikr-e-ab

naqqad jis ke misra-e-sani se jal gae

kuchh log KHak ho gae hijrat ki aag se

kuchh log shauq-e-naql-e-makani se jal gae

aawaz ke daraKHt ka mear kya gira

honTon ke phul talKH-bayani se jal gae