تاثیر کے پردوں کو چھو آئی فغاں میری

تاثیر کے پردوں کو چھو آئی فغاں میری

اب عرصۂ عالم میں گونجے گی اذاں میری

اے رحمت بے پروا کچھ پاس وفا رکھنا

ایسا نہ ہو محشر میں کھل جائے زباں میری

ہر گام پر اک فتنہ اٹھتا ہے قدم لینے

یہ کون سی منزل میں ہے عمر رواں میری

آنکھیں ہوں تو دیکھ اٹھ کر کونین کی ہر شے کو

میں تجھ کو بتاؤں کیا منزل ہے کہاں میری

وہ دور محبت بھی تھا کتنا بہار آگیں

پھولوں میں رہی چشم خوں نابہ فشاں میری

اس گردش پیہم کا نکلے گا نہ کچھ حاصل

اے چرخ سبک مایہ مٹی ہے گراں میری

ہر گام پر اک طرفہؔ عنوان محبت ہے

رکتی ہے کہاں دیکھوں اب طبع رواں میری