tasir ke pardon ko chhu aai fughan meri

tāsīr ke pardoñ ko chhū aa.ī fuġhāñ merī

ab arsa-e-ālam meñ gūñjegī azaañ merī

ai rahmat-e-be-parvā kuchh pās-e-vafā rakhnā

aisā na ho mahshar meñ khul jaa.e zabāñ merī

har gaam par ik fitna uThtā hai qadam lene

ye kaun sī manzil meñ hai umr-e-ravāñ merī

āñkheñ hoñ to dekh uTh kar kaunain kī har shai ko

maiñ tujh ko batā.ūñ kyā manzil hai kahāñ merī

vo daur-e-mohabbat bhī thā kitnā bahār-āgīñ

phūloñ meñ rahī chashm-e-ḳhūnāba fashāñ merī

is gardish-e-paiham kā niklegā na kuchh hāsil

ai charḳh-e-subuk-māya miTTī hai girāñ merī

har-gām par ik 'turfa' unvān-e-mohabbat hai

ruktī hai kahāñ dekhūñ ab tab-e-ravāñ merī

tasir ke pardon ko chhu aai fughan meri

ab arsa-e-alam mein gunjegi azan meri

ai rahmat-e-be-parwa kuchh pas-e-wafa rakhna

aisa na ho mahshar mein khul jae zaban meri

har gam par ek fitna uThta hai qadam lene

ye kaun si manzil mein hai umr-e-rawan meri

aankhen hon to dekh uTh kar kaunain ki har shai ko

main tujh ko bataun kya manzil hai kahan meri

wo daur-e-mohabbat bhi tha kitna bahaar-agin

phulon mein rahi chashm-e-KHunaba fashan meri

is gardish-e-paiham ka niklega na kuchh hasil

ai charKH-e-subuk-maya miTTi hai giran meri

har-gam par ek 'turfa' unwan-e-mohabbat hai

rukti hai kahan dekhun ab tab-e-rawan meri