tasir meri harf-e-dua tak nahin aati

tāsīr mirī harf-e-du'ā tak nahīñ aatī

kambaḳht ko tā'zīm-e-ḳhudā tak nahīñ aatī

kis shahr meñ chhoḌā hai mirī be-ḳhabarī ne

jis shahr kī galiyoñ meñ havā tak nahīñ aatī

ġhunchoñ ke chaTakne kā to kyā zikr hai pyāre

gulshan meñ to ab garm havā tak nahīñ aatī

jab tak na jale ḳhūn-e-jigar ḳhūn-e-tamannā

muflis ke charāġhoñ meñ ziyā tak nahīñ aatī

hai manzil-e-ġhurbat meñ ḳhamoshī hī ḳhamoshī

pattoñ ke khaḌakne kī sadā tak nahīñ aatī

shaffāf hai shīshe kī tarah rāh-e-sadāqat

is raah meñ gard-e-kaf-e-pā tak nahīñ aatī

insāf kī āñkheñ na agar band hoñ 'bismil'

ġhurbat kisī dastūr-e-sazā tak nahīñ aatī

tasir meri harf-e-du'a tak nahin aati

kambaKHt ko ta'zim-e-KHuda tak nahin aati

kis shahr mein chhoDa hai meri be-KHabari ne

jis shahr ki galiyon mein hawa tak nahin aati

ghunchon ke chaTakne ka to kya zikr hai pyare

gulshan mein to ab garm hawa tak nahin aati

jab tak na jale KHun-e-jigar KHun-e-tamanna

muflis ke charaghon mein ziya tak nahin aati

hai manzil-e-ghurbat mein KHamoshi hi KHamoshi

patton ke khaDakne ki sada tak nahin aati

shaffaf hai shishe ki tarah rah-e-sadaqat

is rah mein gard-e-kaf-e-pa tak nahin aati

insaf ki aankhen na agar band hon 'bismil'

ghurbat kisi dastur-e-saza tak nahin aati