taza-ba-taza subh ke aKHbar ki tarah

tāza-ba-tāza sub.h ke aḳhbār kī tarah

bechā gayā maiñ aaj bhī har baar kī tarah

qātil hai merī jaan kā dushman hai vo magar

miltā hai mujh se jo kisī ġham-ḳhvār kī tarah

ik shai ki jis kā naam hai ehsās zehn meñ

paiham khaTaktā rahtā hai ik ḳhaar kī tarah

maiñ apnī be-gunāhī pe ḳhud apne aap meñ

rahtā huuñ sharmsār gunahgār kī tarah

karte haiñ baat baat meñ jazboñ kā mol-tol

karte haiñ log pyaar bhī byopār kī tarah

chāhat bhī in kī hotī hai nafrat liye hue

iqrār bhī vo karte haiñ inkār kī tarah

'āġhāz' har zabān pe har ek bazm meñ

hai us kā tazkira mire ash.ār kī tarah

taza-ba-taza subh ke aKHbar ki tarah

becha gaya main aaj bhi har bar ki tarah

qatil hai meri jaan ka dushman hai wo magar

milta hai mujh se jo kisi gham-KHwar ki tarah

ek shai ki jis ka nam hai ehsas zehn mein

paiham khaTakta rahta hai ek KHar ki tarah

main apni be-gunahi pe KHud apne aap mein

rahta hun sharmsar gunahgar ki tarah

karte hain baat baat mein jazbon ka mol-tol

karte hain log pyar bhi byopar ki tarah

chahat bhi in ki hoti hai nafrat liye hue

iqrar bhi wo karte hain inkar ki tarah

'aghaz' har zaban pe har ek bazm mein

hai us ka tazkira mere ashaar ki tarah