taza hawa ke waste khiDki na ban saka

taaza havā ke vāste khiḌkī na ban sakā

de duuñ kisī ko chhāñv vo badlī na ban sakā

beTā basā bides meñ daulat ke Dher par

lekin vo būḌhe baap kī lāThī na ban sakā

shā'ir kā vāsta baḌā gahrā hai bhuuk se

us kā kalām aaj bhī roTī na ban sakā

kyuuñ kar karūñ umiid tū mujh sā banegā dost

jaisā maiñ chāhtā huuñ vo ḳhud bhī na ban sakā

kā'be se lauT kar vahī sūd-o-ziyāñ kī fikr

haj kar liyā magar kabhī haajī na ban sakā

rah ke bhī duur sun sake abbā kī khāñsiyāñ

beTā kabhī bhī baap kī beTī na ban sakā

ḳhud kī kamī ko chhoḌ ke ġhairoñ pe hī uThe

maiñ aaj tak 'sahāb' vo uñglī na ban sakā

taza hawa ke waste khiDki na ban saka

de dun kisi ko chhanw wo badli na ban saka

beTa basa bides mein daulat ke Dher par

lekin wo buDhe bap ki laThi na ban saka

sha'ir ka wasta baDa gahra hai bhuk se

us ka kalam aaj bhi roTi na ban saka

kyun kar karun umid tu mujh sa banega dost

jaisa main chahta hun wo KHud bhi na ban saka

ka'be se lauT kar wahi sud-o-ziyan ki fikr

haj kar liya magar kabhi haji na ban saka

rah ke bhi dur sun sake abba ki khansiyan

beTa kabhi bhi bap ki beTi na ban saka

KHud ki kami ko chhoD ke ghairon pe hi uThe

main aaj tak 'sahab' wo ungli na ban saka