تازگی عارض گل پہ ہے نہ رعنائی ہے

تازگی عارض گل پہ ہے نہ رعنائی ہے

کون کہتا ہے گلستاں میں بہار آئی ہے

زندگی سارے مراحل سے گزر آئی ہے

اب تو بس تو ہے تری یاد ہے تنہائی ہے

نیچی نظریں کئے خاموش ہی دیکھا اس کو

جس کی تصویر میں بھی قوت گویائی ہے

تو کہ مستور ہے آنکھوں سے یہ تسلیم مگر

ذرے ذرے سے عیاں کس کی یہ رعنائی ہے

دیکھیے لے کے کہاں جاتی ہے اب موج بلا

گہرے دریا سے تو یہ زیست ابھر آئی ہے

دن کے ڈھلتے ہی چلی آتی ہے تو پاس مرے

کتنی مونس تو مری اے شب تنہائی ہے

دل مرا ٹوٹ گیا ہے تو یہ عالم ہے شریفؔ

نغمے بے کیف ہیں غمگین سی شہنائی ہے