tazgi har shai pe aai mausam-e-barsat mein

tāzgī har shai pe aa.ī mausam-e-barsāt meñ

khil uThā zaḳhm-e-judā.ī mausam-e-barsāt meñ

kaise murda log phir se zinda hoñge dekh lo

dī zamīnoñ ne gavāhī mausam-e-barsāt meñ

dushmanoñ ko ek kar de rab kī qudrat be-misāl

fasl-e-bārāñ dhuup laa.ī mausam-e-barsāt meñ

abr tū insāñ ke jaisā adl se ġhāfil na ho

kyā zamīñ apnī parā.ī mausam-e-barsāt meñ

ThanDī purvā.ī chalī to un kī mauj-e-zulf bhī

gaal ke sāhil tak aa.ī mausam-e-barsāt meñ

soñdhī soñdhī sī mahak aa.ī to yaad aaya hameñ

aap kā dast-e-hinā.ī mausam-e-barsāt meñ

vaqt jis ke saath hai tū bhī usī ke saath chal

garmiyoñ kī kar burā.ī mausam-e-barsāt meñ

ghan-garaj kar daad dete haiñ tumheñ bādal 'nabīl'

kyā ġhazal tum ne sunā.ī mausam-e-barsāt meñ

tazgi har shai pe aai mausam-e-barsat mein

khil uTha zaKHm-e-judai mausam-e-barsat mein

kaise murda log phir se zinda honge dekh lo

di zaminon ne gawahi mausam-e-barsat mein

dushmanon ko ek kar de rab ki qudrat be-misal

fasl-e-baran dhup lai mausam-e-barsat mein

abr tu insan ke jaisa adl se ghafil na ho

kya zamin apni parai mausam-e-barsat mein

ThanDi purwai chali to un ki mauj-e-zulf bhi

gal ke sahil tak aai mausam-e-barsat mein

sondhi sondhi si mahak aai to yaad aaya hamein

aap ka dast-e-hinai mausam-e-barsat mein

waqt jis ke sath hai tu bhi usi ke sath chal

garmiyon ki kar burai mausam-e-barsat mein

ghan-garaj kar dad dete hain tumhein baadal 'nabil'

kya ghazal tum ne sunai mausam-e-barsat mein