tazim-e-mohabbat hai na takrim-e-wafa hai

tāzīm-e-mohabbat hai na takrīm-e-vafā hai

gul-kārī-e-daurāñ kā faqat naam baḌā hai

gulzār-e-mohabbat meñ vahī phuul banā hai

jis ġhuncha-e-nau-ḳhez meñ īsār-o-vafā hai

ā.īna mukaddar ho to dhuñdlātī hai tasvīr

shaffāf nigāhoñ meñ tahārat kī ziyā hai

har shaḳhs yahāñ apnī anā meñ hai muqayyad

bātil kā vahī zo.am vahī kizb-o-riyā hai

ham DhūñD rahe haiñ jise sāvan kī ghaTā meñ

vo qatra-e-sayyāl to āñkhoñ meñ chhupā hai

yuuñ āñkhoñ se Tapke shab-e-dījūr meñ aañsū

dāman bhī chamakte hue tāroñ se bharā hai

kahte haiñ 'jamīl' aap ko arbāb-e-basīrat

ik saada sā insān hai bātoñ kā kharā hai

tazim-e-mohabbat hai na takrim-e-wafa hai

gul-kari-e-dauran ka faqat nam baDa hai

gulzar-e-mohabbat mein wahi phul bana hai

jis ghuncha-e-nau-KHez mein isar-o-wafa hai

aaina mukaddar ho to dhundlati hai taswir

shaffaf nigahon mein tahaarat ki ziya hai

har shaKHs yahan apni ana mein hai muqayyad

baatil ka wahi zoam wahi kizb-o-riya hai

hum DhunD rahe hain jise sawan ki ghaTa mein

wo qatra-e-sayyal to aankhon mein chhupa hai

yun aankhon se Tapke shab-e-dijur mein aansu

daman bhi chamakte hue taron se bhara hai

kahte hain 'jamil' aap ko arbab-e-basirat

ek sada sa insan hai baaton ka khara hai