تعظیم محبت ہے نہ تکریم وفا ہے

تعظیم محبت ہے نہ تکریم وفا ہے

گل کاریٔ دوراں کا فقط نام بڑا ہے

گلزار محبت میں وہی پھول بنا ہے

جس غنچۂ نوخیز میں ایثار و وفا ہے

آئینہ مکدر ہو تو دھندلاتی ہے تصویر

شفاف نگاہوں میں طہارت کی ضیا ہے

ہر شخص یہاں اپنی انا میں ہے مقید

باطل کا وہی زعم وہی کذب و ریا ہے

ہم ڈھونڈ رہے ہیں جسے ساون کی گھٹا میں

وہ قطرۂ سیال تو آنکھوں میں چھپا ہے

یوں آنکھوں سے ٹپکے شب دیجور میں آنسو

دامن بھی چمکتے ہوئے تاروں سے بھرا ہے

کہتے ہیں جمیلؔ آپ کو ارباب بصیرت

اک سادہ سا انسان ہے باتوں کا کھرا ہے