tab-e-hassas ab is sath pe le aai hamein

tab'-e-hassās ab is sat.h pe le aa.ī hameñ

mahfiloñ meñ bhī satāne lagī tanhā.ī hameñ

shahr-dar-shahr liye phirtī hai rusvā.ī hameñ

zindagī dād-e-vafā tū bhī na de paa.ī hameñ

ham tamāshā the kabhī dīda-e-ibrat kī qasam

ab tamāshā nazar aate haiñ tamāshā.ī hameñ

jaag uThtā hai kisī lams kā ehsās abhī

chheḌ kar jab bhī guzar jaatī hai purvā.ī hameñ

phir kabhī aaya na vo jāma-darī kā mausam

vaah re baḳht ki vahshat bhī na raas aa.ī hameñ

ye bhī tā'na hī to hai tujh se bichhaḌ kar ai dost

shāḳh-e-gul yaad dilā.e tirī añgḌā.ī hameñ

muñh chhupāne kā hunar bhī nahīñ aaya 'afzal'

aur jiine bhī nahīñ dete shanāsā.ī hameñ

tab'-e-hassas ab is sath pe le aai hamein

mahfilon mein bhi satane lagi tanhai hamein

shahr-dar-shahr liye phirti hai ruswai hamein

zindagi dad-e-wafa tu bhi na de pai hamein

hum tamasha the kabhi dida-e-ibrat ki qasam

ab tamasha nazar aate hain tamashai hamein

jag uThta hai kisi lams ka ehsas abhi

chheD kar jab bhi guzar jati hai purwai hamein

phir kabhi aaya na wo jama-dari ka mausam

wah re baKHt ki wahshat bhi na ras aai hamein

ye bhi ta'na hi to hai tujh se bichhaD kar ai dost

shaKH-e-gul yaad dilae teri angDai hamein

munh chhupane ka hunar bhi nahin aaya 'afzal'

aur jine bhi nahin dete shanasai hamein