طبع حساس اب اس سطح پہ لے آئی ہمیں

طبع حساس اب اس سطح پہ لے آئی ہمیں

محفلوں میں بھی ستانے لگی تنہائی ہمیں

شہر در شہر لیے پھرتی ہے رسوائی ہمیں

زندگی داد وفا تو بھی نہ دے پائی ہمیں

ہم تماشا تھے کبھی دیدۂ عبرت کی قسم

اب تماشا نظر آتے ہیں تماشائی ہمیں

جاگ اٹھتا ہے کسی لمس کا احساس ابھی

چھیڑ کر جب بھی گزر جاتی ہے پروائی ہمیں

پھر کبھی آیا نہ وہ جامہ دری کا موسم

واہ رے بخت کہ وحشت بھی نہ راس آئی ہمیں

یہ بھی طعنہ ہی تو ہے تجھ سے بچھڑ کر اے دوست

شاخ گل یاد دلائے تری انگڑائی ہمیں

منہ چھپانے کا ہنر بھی نہیں آیا افضلؔ

اور جینے بھی نہیں دیتے شناسائی ہمیں