tabah kar ke har ek naqsh-e-jism-o-jaan humne

tabāh kar ke har ik naqsh-e-jism-o-jāñ ham ne

banā diyā hai mohabbat ko jāvedāñ ham ne

ġhalat-ravī pe tirī tabsira muhāl na thā

tirā lihāz kiyā mīr-e-kārvāñ ham ne

hamāre dīda-e-be-āb ko na ta.ane do

luTā diyā hai sitāroñ kā ik jahāñ ham ne

haTī haTī se tavajjoh ye ahl-e-mahfil kī

badal diyā hai kahīñ rañg-e-dāstāñ ham ne

sitam kiye haiñ bahut dil pe ye haqīqat hai

ayaañ na kar ke vafūr-e-ġham-e-nihāñ ham ne

na-jāne rāz-e-mohabbat kā hashr kyā hogā

banā liye haiñ ka.ī apne rāz-dāñ ham ne

nigāh sirf tahayyur havās vārafta

liyā thā jazb-e-mohabbat kā imtihāñ ham ne

na jaane kaun sī aafat 'nasīr' ho nāzil

agar chaman meñ kiyā zikr-e-āshiyāñ ham ne

tabah kar ke har ek naqsh-e-jism-o-jaan hum ne

bana diya hai mohabbat ko jawedan hum ne

ghalat-rawi pe teri tabsira muhaal na tha

tera lihaz kiya mir-e-karwan hum ne

hamare dida-e-be-ab ko na tane do

luTa diya hai sitaron ka ek jahan hum ne

haTi haTi se tawajjoh ye ahl-e-mahfil ki

badal diya hai kahin rang-e-dastan hum ne

sitam kiye hain bahut dil pe ye haqiqat hai

ayan na kar ke wafur-e-gham-e-nihan hum ne

na-jaane raaz-e-mohabbat ka hashr kya hoga

bana liye hain kai apne raaz-dan hum ne

nigah sirf tahayyur hawas warafta

liya tha jazb-e-mohabbat ka imtihan hum ne

na jaane kaun si aafat 'nasir' ho nazil

agar chaman mein kiya zikr-e-ashiyan hum ne