tabah zist magar ek bazigar ne ki

tabāh ziist magar ek bāzīgar ne kī

vagarna vaj.h na thī TuuT kar bikharne kī

vo uḌ chukā hai to phir us kī maan lete haiñ

use to zid sī hai ilzām ham pe dharne kī

tamām ḳhvāb pareshāñ the shab kī mahfil meñ

na-jāne baat kyā tāroñ se chashm-e-tar ne kī

vo rath meñ aañkh kī har pal chamaktā rahtā hai

ye rut hai jugnuoñ ke ḳhaak par utarne kī

hai chhed chhed mirā dāman-e-savāl bhī ab

ajiib hālat-e-dil mere jādūgar ne kī

samā.atoñ kā nasha hai ki shor paa.el kā

ḳhirad bhī chhīn ga.ī haiñ sadā.eñ jharne kī

kitāb-e-vaqt kā har baab hifz kar Daalā

paḌhī na mashq magar qaul se mukarne kī

nahīñ thī ziist muqaddar na bach sake varna

bahut sa.ī mire ma.asūm chārāgar ne kī

'rashīd' ham ne faqīrī meñ vaqt kaaT liyā

agarche taaj sajāne kī zid bhī sar ne kī

tabah zist magar ek bazigar ne ki

wagarna wajh na thi TuT kar bikharne ki

wo uD chuka hai to phir us ki man lete hain

use to zid si hai ilzam hum pe dharne ki

tamam KHwab pareshan the shab ki mahfil mein

na-jaane baat kya taron se chashm-e-tar ne ki

wo rath mein aankh ki har pal chamakta rahta hai

ye rut hai jugnuon ke KHak par utarne ki

hai chhed chhed mera daman-e-sawal bhi ab

ajib haalat-e-dil mere jadugar ne ki

samaaton ka nasha hai ki shor pael ka

KHirad bhi chhin gai hain sadaen jharne ki

kitab-e-waqt ka har bab hifz kar Dala

paDhi na mashq magar qaul se mukarne ki

nahin thi zist muqaddar na bach sake warna

bahut sai mere masum chaaragar ne ki

'rashid' hum ne faqiri mein waqt kaT liya

agarche taj sajaane ki zid bhi sar ne ki