tabassum-e-lab-e-KHandan ke sath sath chalo

tabassum-e-lab-e-ḳhandāñ ke saath saath chalo

surūr-e-shoḳhī-e-pinhāñ ke saath saath chalo

junūñ meñ ḳhū-e-ġhazālāñ ke saath saath chalo

shi.ār-e-hashr-badāmāñ ke saath saath chalo

uThā.e bār-e-alam dosh par zamāne kā

hujūm-e-gardish-e-daurāñ ke saath saath chalo

thakan bane na kabhī ab se paañv kī zanjīr

diloñ meñ azm-e-farāvāñ ke saath saath chalo

banā lo apnī adāoñ kā sab ko dīvāna

vagarna umr-e-gurezāñ ke saath saath chalo

chhupā.e sīnoñ meñ ehsās-e-zindagī kī chubhan

tasavvur-e-ġham-e-daurāñ ke saath saath chalo

banā ke chhoḌ do kundan ḳharāb-hāloñ ko

hikāyat-e-ruḳh-e-jānāñ ke saath saath chalo

uThā.e tum pe zamāna na uñgliyāñ 'bismil'

nigāh-e-shorish-e-pinhāñ ke saath saath chalo

tabassum-e-lab-e-KHandan ke sath sath chalo

surur-e-shoKHi-e-pinhan ke sath sath chalo

junun mein KHu-e-ghazalan ke sath sath chalo

shiar-e-hashr-badaman ke sath sath chalo

uThae bar-e-alam dosh par zamane ka

hujum-e-gardish-e-dauran ke sath sath chalo

thakan bane na kabhi ab se panw ki zanjir

dilon mein azm-e-farawan ke sath sath chalo

bana lo apni adaon ka sab ko diwana

wagarna umr-e-gurezan ke sath sath chalo

chhupae sinon mein ehsas-e-zindagi ki chubhan

tasawwur-e-gham-e-dauran ke sath sath chalo

bana ke chhoD do kundan KHarab-haalon ko

hikayat-e-ruKH-e-jaanan ke sath sath chalo

uThae tum pe zamana na ungliyan 'bismil'

nigah-e-shorish-e-pinhan ke sath sath chalo