tabassum lab pe aankhon mein mohabbat ki kahani hai

tabassum lab pe āñkhoñ meñ mohabbat kī kahānī hai

tumhārī har adā meñ ik nashāt-e-kāmrānī hai

bahut hī muḳhtasar apnī hadīs-e-zindagānī hai

tire aariz ke jalve haiñ mirā ḳhvāb-e-javānī hai

isī sāġhar meñ saaqī dekh āb-e-zindagānī hai

ki mauj-e-mai meñ pinhāñ rāz-e-umr-e-jāvedānī hai

vahī tanhā.ī kā aalam vahī hai yaad phir un kī

vahī maiñ huuñ vahī phir soz-e-ġham-hā-e-nihānī hai

bahār aa.ī hai gulshan meñ magar kumhlā ga.e ġhunche

guloñ ke lab pe yā-rab aaj kāñToñ kī kahānī hai

ajal ko bhī pukārā hai duā-e-zīst bhī kī hai

kabhī dasht-e-junūñ kī ham ne 'manzar' ḳhaak chhānī hai

tabassum lab pe aankhon mein mohabbat ki kahani hai

tumhaari har ada mein ek nashat-e-kaamrani hai

bahut hi muKHtasar apni hadis-e-zindagani hai

tere aariz ke jalwe hain mera KHwab-e-jawani hai

isi saghar mein saqi dekh aab-e-zindagani hai

ki mauj-e-mai mein pinhan raaz-e-umr-e-jawedani hai

wahi tanhai ka aalam wahi hai yaad phir un ki

wahi main hun wahi phir soz-e-gham-ha-e-nihani hai

bahaar aai hai gulshan mein magar kumhla gae ghunche

gulon ke lab pe ya-rab aaj kanTon ki kahani hai

ajal ko bhi pukara hai dua-e-zist bhi ki hai

kabhi dasht-e-junun ki hum ne 'manzar' KHak chhani hai