tabdili-e-mizaj ko aab-o-hawa mile

tabdīlī-e-mizāj ko āb-o-havā mile

sāgar meñ jo kashish hai pahāḌoñ pe kyā mile

maiñ sīpiyāñ hī chuntī huuñ sāhil kī ret se

maiñ DhūñDhtī hī kab huuñ ki motī paḌā mile

āmāda hī nahīñ hai parinda rihā.ī par

zanjīr TuuT jaa.e yā piñjra khulā mile

andar kī toḌ-phoḌ ne tā'mīr kar diyā

ab is se baḌh ke aur bhalā kyā sazā mile

ik maiñ nahīñ akelī sarāboñ ke shauq meñ

apne 'alāva aur ka.ī mubtalā mile

hamdard ban ke sunte haiñ sab kī kahāniyāñ

mazmūn likhne ke liye kuchh to nayā mile

āñkhoñ meñ ek ashk hī rakkhā sañbhāl ke

dekhā na koī ḳhvāb to tā'bīr kyā mile

derīna dostoñ kā kabhī to ḳhayāl kar

ye kyā ki jab mile to sabhī se ḳhafā mile

goyā sukūn-e-qalb 'atā kar diyā gayā

sad-shukr hai ḳhudā kā hameñ mustafā mile

tabdili-e-mizaj ko aab-o-hawa mile

sagar mein jo kashish hai pahaDon pe kya mile

main sipiyan hi chunti hun sahil ki ret se

main DhunDhti hi kab hun ki moti paDa mile

aamada hi nahin hai parinda rihai par

zanjir TuT jae ya pinjra khula mile

andar ki toD-phoD ne ta'mir kar diya

ab is se baDh ke aur bhala kya saza mile

ek main nahin akeli sarabon ke shauq mein

apne 'alawa aur kai mubtala mile

hamdard ban ke sunte hain sab ki kahaniyan

mazmun likhne ke liye kuchh to naya mile

aankhon mein ek ashk hi rakkha sanbhaal ke

dekha na koi KHwab to ta'bir kya mile

derina doston ka kabhi to KHayal kar

ye kya ki jab mile to sabhi se KHafa mile

goya sukun-e-qalb 'ata kar diya gaya

sad-shukr hai KHuda ka hamein mustafa mile