طبیعت بے نیاز لذت غم ہوتی جاتی ہے

طبیعت بے نیاز لذت غم ہوتی جاتی ہے

کسی سے کیا مری دل بستگی کم ہوتی جاتی ہے

نظر تم نے چرا لی تم کسی صورت نہیں ملتے

اسی سے ابتدائے درد پیہم ہوتی جاتی ہے

وہ شے جس کو برنگ عشق میں تریاق سمجھا تھا

وہی شے آج میرے واسطے سم ہوتی جاتی ہے

یہ دل ٹوٹ تھا جب سے اشک آنکھوں میں نہیں تھمتے

مری ہستی غم الفت کی محرم ہوتی جاتی ہے

یہ دنیا عشق کی دنیا ہے یاں دل کی حکومت ہے

محبت یاں ہر اک شے پر مقدم ہوتی جاتی ہے

سمائے جا رہے ہیں تیرے جلوے میری آنکھوں میں

تری ہستی مری ہستی میں مدغم ہوتی جاتی ہے

وداع فصل گل نزدیک ہے اے اوجؔ اب شاید

وگرنہ کیوں مری دیوانگی کم ہوتی جاتی ہے