tabiat be-niyaz-e-lazzat-e-gham hoti jati hai

tabī.at be-niyāz-e-lazzat-e-ġham hotī jaatī hai

kisī se kyā mirī dil-bastagī kam hotī jaatī hai

nazar tum ne churā lī tum kisī sūrat nahīñ milte

isī se ibtidā-e-dard-e-paiham hotī jaatī hai

vo shai jis ko ba-rang-e-ishq maiñ tiryāq samjhā thā

vahī shai aaj mere vāste sam hotī jaatī hai

ye dil TuuT thā jab se ashk āñkhoñ meñ nahīñ thamte

mirī hastī ġham-e-ulfat kī mahram hotī jaatī hai

ye duniyā ishq kī duniyā hai yaañ dil kī hukūmat hai

mohabbat yaañ har ik shai par muqaddam hotī jaatī hai

samā.e jā rahe haiñ tere jalve merī āñkhoñ meñ

tirī hastī mirī hastī meñ mudġham hotī jaatī hai

vidā.a-e-fasl-e-gul nazdīk hai ai 'auj' ab shāyad

vagarna kyoñ mirī dīvāngī kam hotī jaatī hai

tabiat be-niyaz-e-lazzat-e-gham hoti jati hai

kisi se kya meri dil-bastagi kam hoti jati hai

nazar tum ne chura li tum kisi surat nahin milte

isi se ibtida-e-dard-e-paiham hoti jati hai

wo shai jis ko ba-rang-e-ishq main tiryaq samjha tha

wahi shai aaj mere waste sam hoti jati hai

ye dil TuT tha jab se ashk aankhon mein nahin thamte

meri hasti gham-e-ulfat ki mahram hoti jati hai

ye duniya ishq ki duniya hai yan dil ki hukumat hai

mohabbat yan har ek shai par muqaddam hoti jati hai

samae ja rahe hain tere jalwe meri aankhon mein

teri hasti meri hasti mein mudgham hoti jati hai

widaa-e-fasl-e-gul nazdik hai ai 'auj' ab shayad

wagarna kyon meri diwangi kam hoti jati hai