tabiat in dinon auham ki un manzilon par hai

tabī.at in dinoñ auhām kī un manziloñ par hai

dil-e-kam-hausla kāġhaz kī giilī kashtiyoñ par hai

guzashta mausamoñ meñ bujh ga.e haiñ rañg phūloñ ke

darīcha ab bhī merā raushnī ke zāviyoñ par hai

hazāroñ ābnūsī jañgaloñ kā husn kyā ma.anī

hameñ jab saañs lenā kīmiyā.ī tajraboñ par hai

kaḌhā hai merī ajrak par balochī kaam shīshe kā

kisī ke aks kī qaus-e-quzah sab ā.īnoñ par hai

mire āñgan meñ ik nannhī gilahrī kā baserā hai

bahut ma.asūm sā ik naqsh merī kyāriyoñ par hai

maiñ us par apne andar kī humairā vaar aatī huuñ

magar vo be-yaqīnī meñ abhī pahlī hadoñ par hai

tabiat in dinon auham ki un manzilon par hai

dil-e-kam-hausla kaghaz ki gili kashtiyon par hai

guzashta mausamon mein bujh gae hain rang phulon ke

daricha ab bhi mera raushni ke zawiyon par hai

hazaron aabnusi jangalon ka husn kya mani

hamein jab sans lena kimiyai tajrabon par hai

kaDha hai meri ajrak par balochi kaam shishe ka

kisi ke aks ki qaus-e-quzah sab aainon par hai

mere aangan mein ek nannhi gilahri ka basera hai

bahut masum sa ek naqsh meri kyariyon par hai

main us par apne andar ki humaira war aati hun

magar wo be-yaqini mein abhi pahli hadon par hai