tabiat mein kisi had tak matanat chahiye kuchh aur

tabī'at meñ kisī had tak matānat chāhiye kuchh aur

harīfoñ se bhī na harf-o-hikāyat chāhiye kuchh aur

ab aisī bhī kyā majbūrī ki ḳhud meñ gum rahā jaa.e

badan meñ apne hone kī 'alāmat chāhiye kuchh aur

ḳhizāñ-dīda shajar huuñ phūlnā phalnā magar chāhūñ

mire haq meñ bahāroñ kī himāyat chāhiye kuchh aur

koī maktūb-e-yārāñ ki koī tasvīr-e-jānāñ ho

sadā mahfūz yāroñ kī amānat chāhiye kuchh aur

irāda sarfarāzī kā bahut achchhā sahī lekin

barā.e sarfarāzī qadd-o-qāmat chāhiye kuchh aur

sar-e-atrāf yaḳh-basta havā hai is qadar 'shahzād'

ravāñ apnī rag-o-pai meñ harārat chāhiye kuchh aur

tabi'at mein kisi had tak matanat chahiye kuchh aur

harifon se bhi na harf-o-hikayat chahiye kuchh aur

ab aisi bhi kya majburi ki KHud mein gum raha jae

badan mein apne hone ki 'alamat chahiye kuchh aur

KHizan-dida shajar hun phulna phalna magar chahun

mere haq mein bahaaron ki himayat chahiye kuchh aur

koi maktub-e-yaran ki koi taswir-e-jaanan ho

sada mahfuz yaron ki amanat chahiye kuchh aur

irada sarfaraazi ka bahut achchha sahi lekin

barae sarfaraazi qadd-o-qamat chahiye kuchh aur

sar-e-atraf yaKH-basta hawa hai is qadar 'shahzad'

rawan apni rag-o-pai mein hararat chahiye kuchh aur