تڑپ اے دل کہ پھر تیرے تڑپنے کا مقام آیا

تڑپ اے دل کہ پھر تیرے تڑپنے کا مقام آیا

مقدر میرا بن کر رہ گئی ہے تشنگی میری

نہ ساقی کی نظر اٹھی نہ مجھ تک دور جام آیا

شب فرقت جنون آرزو لمحات تنہائی

دل ناکام ہی ان معرکوں میں میرے کام آیا

ہوا جس طرح بھی میں نے گزارا روز فرقت کو

وہ عالم کیا کہوں اے ہم نشیں جب وقت شام آیا

مرے دل نے دیا درس حقیقت اہل دانش کو

یہ دیوانہ تو تھا لیکن خرد مندوں کے کام آیا

نہ جانا ان کی محفل میں بڑی توہین تھی ان کی

مسلسل ان کی جانب سے سلام آیا پیام آیا