taDap ke raat basar ki jo ek muhim sar ki

taḌap ke raat basar kī jo ik muhim sar kī

chhurī thī mere liye jo shikan thī bistar kī

araq araq haiñ jo garmī se roz-e-mahshar kī

panāh DhūñDte haiñ mere dāman-e-tar kī

huā gumān usī shoḳh-e-sust-paimāñ kā

agar havā se bhī zanjīr hil ga.ī dar kī

isī taraf tire qurbāñ nigāh-e-sharm-ālūd

mujhī pe tez ho ye baaḌh kund ḳhanjar kī

ḳhirām vo jo hilā de jigar farishtoñ kā

nigāh vo jo ulaT de safoñ ko mahshar kī

sajā.ī hazrat-e-vā.iz ne kis takalluf se

matā-e-zohd-o-varā sīḌhiyoñ pe mimbar kī

ubuur bahr-e-haqīqat se jab nahīñ mumkin

kināre baiTh ke lahreñ ginūñ samundar kī

sunegā kaun sunī jā.egī 'safī' kis se

tumhārī rām-kahānī ye zindagī bhar kī

taDap ke raat basar ki jo ek muhim sar ki

chhuri thi mere liye jo shikan thi bistar ki

araq araq hain jo garmi se roz-e-mahshar ki

panah DhunDte hain mere daman-e-tar ki

hua guman usi shoKH-e-sust-paiman ka

agar hawa se bhi zanjir hil gai dar ki

isi taraf tere qurban nigah-e-sharm-alud

mujhi pe tez ho ye baDh kund KHanjar ki

KHiram wo jo hila de jigar farishton ka

nigah wo jo ulaT de safon ko mahshar ki

sajai hazrat-e-waiz ne kis takalluf se

mata-e-zohd-o-wara siDhiyon pe mimbar ki

ubur bahr-e-haqiqat se jab nahin mumkin

kinare baiTh ke lahren ginun samundar ki

sunega kaun suni jaegi 'safi' kis se

tumhaari ram-kahani ye zindagi bhar ki