taDap mein bhi maza aane laga hai gham ke maron ko

taḌap meñ bhī maza aane lagā hai ġham ke māroñ ko

ḳhayāl-e-sarḳhushī bahkā na de in sogvāroñ ko

gulistāñ jo banānā chāhte the ḳhārzāroñ ko

unhīñ kī shoḳh-gāmī rauñdtī hai lāla-zāroñ ko

sa.ādat chāhtā thā kal falak bhī jin ke sajdoñ kī

bagūle DhūñDte phirte haiñ aaj un ke ġhubāroñ ko

mai-o-kausar kī ḳhātir jab ye ḳhud sajdoñ meñ girtā hai

to kis muñh se burā kahtā hai zāhid mai-gusāroñ ko

rumūz-e-ishq se koī use āgāh kar detā

jalā kar hañs rahī hai sham.a apne jāñ-nisāroñ ko

atā kar dī mire husn-e-nazar ne shān-e-yaktā.ī

jahāñ meñ kaun varna pūchhtā thā gul-'izāroñ ko

na dekhe jā sake jo tuur par mushtāq nazroñ se

ba-chashm-e-shauq ham ne ḳhuub dekhā un nazāroñ ko

azal se jo fanā kā ḳhauf le kar sahme baiThe haiñ

talātum-āshnā kartā hai 'sābir' un kināroñ ko

taDap mein bhi maza aane laga hai gham ke maron ko

KHayal-e-sarKHushi bahka na de in sogwaron ko

gulistan jo banana chahte the KHarzaron ko

unhin ki shoKH-gami raundti hai lala-zaron ko

saadat chahta tha kal falak bhi jin ke sajdon ki

bagule DhunDte phirte hain aaj un ke ghubaron ko

mai-o-kausar ki KHatir jab ye KHud sajdon mein girta hai

to kis munh se bura kahta hai zahid mai-gusaron ko

rumuz-e-ishq se koi use aagah kar deta

jala kar hans rahi hai shama apne jaan-nisaron ko

ata kar di mere husn-e-nazar ne shan-e-yaktai

jahan mein kaun warna puchhta tha gul-'izaron ko

na dekhe ja sake jo tur par mushtaq nazron se

ba-chashm-e-shauq hum ne KHub dekha un nazaron ko

azal se jo fana ka KHauf le kar sahme baiThe hain

talatum-ashna karta hai 'sabir' un kinaron ko