taDap taDap ke guzari hai raat kis se kahen

taḌap taḌap ke guzārī hai raat kis se kaheñ

hazār karb kī maarī hai raat kis se kaheñ

use bhī hijr kā sadma hai din kī chāhat hai

kise batā.eñ kuñvārī hai raat kis se kaheñ

ġham-e-firāq meñ ik lutf bhī to aatā hai

baḌī aziiz hai pyārī hai raat kis se kaheñ

yahī hai apnā muqaddar yahī nasīb bhī hai

ye din hamārā hamārī hai raat kis se kaheñ

sahar huī hai magar ab bhī aisā lagtā hai

vahī añdherā hai jaarī hai raat kis se kaheñ

na niiñd āñkhoñ meñ aa.ī na ḳhvāb aate haiñ

mire vajūd pe bhārī hai raat kis se kaheñ

kisī kī yaad kā dāman pakaḌ ke baiTh ga.e

kuchh is tarah se sañvārī hai raat kis se kaheñ

ye zindagī bhī faqat ek shab kā qissa hai

tamām umr pe taarī hai raat kis se kaheñ

nahīñ hai koī shikāyat 'nasīm-ansārī’

ki hukm-e-rab ne utārī hai raat kis se kaheñ

taDap taDap ke guzari hai raat kis se kahen

hazar karb ki mari hai raat kis se kahen

use bhi hijr ka sadma hai din ki chahat hai

kise bataen kunwari hai raat kis se kahen

gham-e-firaq mein ek lutf bhi to aata hai

baDi aziz hai pyari hai raat kis se kahen

yahi hai apna muqaddar yahi nasib bhi hai

ye din hamara hamari hai raat kis se kahen

sahar hui hai magar ab bhi aisa lagta hai

wahi andhera hai jari hai raat kis se kahen

na nind aankhon mein aai na KHwab aate hain

mere wajud pe bhaari hai raat kis se kahen

kisi ki yaad ka daman pakaD ke baiTh gae

kuchh is tarah se sanwari hai raat kis se kahen

ye zindagi bhi faqat ek shab ka qissa hai

tamam umr pe tari hai raat kis se kahen

nahin hai koi shikayat 'nasim-ansari’

ki hukm-e-rab ne utari hai raat kis se kahen