تڑپتے ہیں غم فرقت میں تڑپایا نہیں کرتے

تڑپتے ہیں غم فرقت میں تڑپایا نہیں کرتے

محبت کرنے والے غم سے گھبرایا نہیں کرتے

چلے آؤ محبت میں تکلف کیا ضروری ہے

تم اپنے ہو تو پھر اپنوں سے شرمایا نہیں کرتے

محبت میں متاع جان و دل ہے اے مرے ہمدم

جو جان زندگی ہو اس سے کترایا نہیں کرتے

یہ قسمیں اور وعدے پیار الفت کے نبھائیں گے

یقیناً ہم کبھی جھوٹی قسم کھایا نہیں کرتے

سلیمؔ اپنا تو شیوہ ہے محبت کرنے والوں کو

گلے بڑھ کر لگا لیتے ہیں ٹھکرایا نہیں کرتے