taDpen kab tak teri furqat mein mohabbat wale

taḌpeñ kab tak tirī furqat meñ mohabbat vaale

aa idhar bhī kabhī o nāz-o-nazākat vaale

shaiḳh-o-vā.iz hoñ na kis tarah karāmat vaale

hazrat-e-pīr-e-muġhāñ kī haiñ ye sohbat vaale

kab tak īzā.eñ saheñ terī mohabbat vaale

rahm kar rahm kar o zulm kī aadat vaale

shaiḳh rindoñ ko burā kah ke gunahgār na ban

are kambaḳht yahī log haiñ jannat vaale

dekh jā aa ke ki ab naza.a kī hālat hai mirī

itnī taklīf kar ai merī nazākat vaale

mujh se aasī ko jo mahshar meñ milā bāġh-e-bahisht

rah ga.e dekh ke muñh zohd-o-ibādat vaale

terī furqat meñ taḌaptā hai mirā dil kaisā

dekh aa kar kabhī o saḳht tabī.at vaale

jhuum kar aane to de abr-e-siyah ai saaqī

abhī aa jā.eñge maiḳhāne kī sohbat vaale

dil to kyā jaan fidā kar deñ tire qadmoñ par

āshiqoñ meñ tire aise bhī haiñ himmat vaale

chīḳh uThe aate hī masjid meñ janāb-e-vā.iz

chauñk uThte haiñ yuuñ hī ḳhvāb se ġhaflat vaale

koī kartā hai mai-e-ishq ko jaa.ez koī man.a

dekheñ kyā hukm lagāte haiñ sharī.at vaale

sohbat-e-mai meñ bhī miltā nahīñ vaa.iz ko maza

aise dekhe hī nahīñ ḳhushk tabī.at vaale

rah gayā chup hī savāloñ pe nakīrain ke maiñ

sun chukā thā ki farishte haiñ ye jannat vaale

kal se hai va.ada-e-vasl aaj na kah yaad nahīñ

is qadar bhuul na o bhuul kī aadat vaale

qabr se uTh ke qayāmat meñ vahīñ pahūñcheñge

hauz-e-kausar hī pe dam leñge tire matvāle

mayyat-e-āshiq-e-shaidā hai uThānā lāzim

itnā nāzuk na ban o mere nazākat vaale

munfa.il ho ke hue pursish-e-isyāñ se barī

sab se achchhe rahe mahshar meñ nadāmat vaale

ham kaheñ kyā ki hameñ kuchh nahīñ aatā hai 'fahīm'

naaz karte haiñ tabī.at pe tabī.at vaale

taDpen kab tak teri furqat mein mohabbat wale

aa idhar bhi kabhi o naz-o-nazakat wale

shaiKH-o-waiz hon na kis tarah karamat wale

hazrat-e-pir-e-mughan ki hain ye sohbat wale

kab tak izaen sahen teri mohabbat wale

rahm kar rahm kar o zulm ki aadat wale

shaiKH rindon ko bura kah ke gunahgar na ban

are kambaKHt yahi log hain jannat wale

dekh ja aa ke ki ab naza ki haalat hai meri

itni taklif kar ai meri nazakat wale

mujh se aasi ko jo mahshar mein mila bagh-e-bahisht

rah gae dekh ke munh zohd-o-ibaadat wale

teri furqat mein taDapta hai mera dil kaisa

dekh aa kar kabhi o saKHt tabiat wale

jhum kar aane to de abr-e-siyah ai saqi

abhi aa jaenge maiKHane ki sohbat wale

dil to kya jaan fida kar den tere qadmon par

aashiqon mein tere aise bhi hain himmat wale

chiKH uThe aate hi masjid mein janab-e-waiz

chaunk uThte hain yun hi KHwab se ghaflat wale

koi karta hai mai-e-ishq ko jaez koi mana

dekhen kya hukm lagate hain shariat wale

sohbat-e-mai mein bhi milta nahin waiz ko maza

aise dekhe hi nahin KHushk tabiat wale

rah gaya chup hi sawalon pe nakirain ke main

sun chuka tha ki farishte hain ye jannat wale

kal se hai wada-e-wasl aaj na kah yaad nahin

is qadar bhul na o bhul ki aadat wale

qabr se uTh ke qayamat mein wahin pahunchenge

hauz-e-kausar hi pe dam lenge tere matwale

mayyat-e-ashiq-e-shaida hai uThana lazim

itna nazuk na ban o mere nazakat wale

munfail ho ke hue pursish-e-isyan se bari

sab se achchhe rahe mahshar mein nadamat wale

hum kahen kya ki hamein kuchh nahin aata hai 'fahim'

naz karte hain tabiat pe tabiat wale