tafazzulat nahin lutf ki nigah nahin

tafazzulāt nahīñ lutf kī nigāh nahīñ

muāmla abhī mutlaq vo rū-ba-rāh nahīñ

ġhalat hai aah ki hai dil ko dil se raah nahīñ

ki terī chaah mujhe tujh ko merī chaah nahīñ

ġhulām ham to haiñ aise mizāj vāloñ ke

kisī ke saath kisī Dhab kī jin ko raah nahīñ

hamārī chorī jo sābit huī dalīl bhī kuchh

muqir nahīñ koī shāhid nahīñ gavāh nahīñ

tavāzo aap kī ham kyā kareñ bhalā sāhib

ba-qaul shaḳhse is apne jigar meñ aah nahīñ

rukhā.iyāñ jo yahī haiñ to is tarah apnā

nahīñ nahīñ nahīñ hargiz nahīñ nibāh nahīñ

haram se dair meñ yaañ āb-o-dāna le aayā

ba-rabb-e-ka.aba mirā is meñ kuchh gunāh nahīñ

na kuchh jihat na sabab qāh-qāh hañste ho

tumhārī ḳhush mujhe aatī ye qāh-qāh nahīñ

kahūñ ba-qaid-e-qasam lā-ilāha il-lallāh

ki tāb-e-hijr bas ab mujh meñ ai ilaah nahīñ

tafazzulat nahin lutf ki nigah nahin

muamla abhi mutlaq wo ru-ba-rah nahin

ghalat hai aah ki hai dil ko dil se rah nahin

ki teri chah mujhe tujh ko meri chah nahin

ghulam hum to hain aise mizaj walon ke

kisi ke sath kisi Dhab ki jin ko rah nahin

hamari chori jo sabit hui dalil bhi kuchh

muqir nahin koi shahid nahin gawah nahin

tawazo aap ki hum kya karen bhala sahib

ba-qaul shaKHse is apne jigar mein aah nahin

rukhaiyan jo yahi hain to is tarah apna

nahin nahin nahin hargiz nahin nibah nahin

haram se dair mein yan aab-o-dana le aaya

ba-rabb-e-kaba mera is mein kuchh gunah nahin

na kuchh jihat na sabab qah-qah hanste ho

tumhaari KHush mujhe aati ye qah-qah nahin

kahun ba-qaid-e-qasam la-ilaha il-lallah

ki tab-e-hijr bas ab mujh mein ai ilah nahin