taghaful aur karam donon barabar kaam karte the

taġhāful aur karam donoñ barābar kaam karte the

jigar ke zaḳhm bharte the to dil ke daaġh ubharte the

ḳhudā jaane hameñ kyā thā ki phir bhī un pe marte the

jo din bhar meñ hazāroñ va.ade karte the mukarte the

na pūchho un kī tasvīr-e-ḳhyālī kī sajāvaT ko

udhar dil rañg detā thā idhar ham rañg bharte the

mohabbat kā samundar us kī maujeñ ai ma.āz-allāh

dil itnā Dūbtā jaatā thā jitnā ham ubharte the

ajab kuchh zindagānī ho ga.ī thī hijr meñ apnī

na hañste the na rote the na jiite the na marte the

shahīdān-e-vafā kī manzileñ to ye are to ye

vo rāheñ band ho jātīñ thiiñ jin par se guzarte the

na pūchho us kī bazm-e-nāz kī kaifiyyateñ 'manzar'

hazāroñ baar jiite the hazāroñ baar marte the

taghaful aur karam donon barabar kaam karte the

jigar ke zaKHm bharte the to dil ke dagh ubharte the

KHuda jaane hamein kya tha ki phir bhi un pe marte the

jo din bhar mein hazaron wade karte the mukarte the

na puchho un ki taswir-e-KHyali ki sajawaT ko

udhar dil rang deta tha idhar hum rang bharte the

mohabbat ka samundar us ki maujen ai maaz-allah

dil itna Dubta jata tha jitna hum ubharte the

ajab kuchh zindagani ho gai thi hijr mein apni

na hanste the na rote the na jite the na marte the

shahidan-e-wafa ki manzilen to ye are to ye

wo rahen band ho jatin thin jin par se guzarte the

na puchho us ki bazm-e-naz ki kaifiyyaten 'manzar'

hazaron bar jite the hazaron bar marte the