تہ بہ تہ آسمان جیسی تھی

تہ بہ تہ آسمان جیسی تھی

ہر مصیبت چٹان جیسی تھی

دار فانی میں عیش کیا کرتے

زندگی امتحان جیسی تھی

چاہتوں کی حسین راہوں میں

دھوپ بھی سائبان جیسی تھی

جسم سارا سجا ہوا گلشن

روح خالی میان جیسی تھی

دن بھی کٹتا نہ تھا محبت میں

رات بھی سخت جان جیسی تھی

شہر میں آ کے بن گئی کیا کچھ

گاؤں میں یہ کسان جیسی تھی

سنتا رہتا تھا اس کو ہر لمحہ

وہ حسیں داستان جیسی تھی

اس کی ہستی بھی کیا کہوں ناشادؔ

میرے اجڑے مکان جیسی تھی