tah-ba-tah uljhi hui rahguzar mein gum tha

tah-ba-tah uljhī huī rāhguzar meñ gum thā

maiñ ki har lamha balā-ḳhez safar meñ gum thā

ek afsurda-o-namnāk fazā raushan thī

aur maiñ ḳhauf ke tārīk khañDar meñ gum thā

tah-e-girdāb nihāñ thā na sar-e-āb ayaañ

ya.anī vo halqa-e-sad-mauj-e-hunar meñ gum thā

justujū ḳhaak uḌātī rahī shahroñ shahroñ

apnā sarmāya-e-jāñ apne hī ghar meñ gum thā

har qadam par shajar-e-shauq ke saa.e the magar

dam-e-fursat bhī to maiñ ḳhvāb-e-safar meñ gum thā

bas-ki ye raaz khulā bhī to pas-e-marg-e-talāsh

vo mirī āñkhoñ meñ maiñ us kī nazar meñ gum thā

har qadam par na.ī dīvār thī mahrūmī kī

hausla ḳhaak uḌāne kā safar meñ gum thā

tah-ba-tah uljhi hui rahguzar mein gum tha

main ki har lamha bala-KHez safar mein gum tha

ek afsurda-o-namnak faza raushan thi

aur main KHauf ke tarik khanDar mein gum tha

tah-e-girdab nihan tha na sar-e-ab ayan

yani wo halqa-e-sad-mauj-e-hunar mein gum tha

justuju KHak uDati rahi shahron shahron

apna sarmaya-e-jaan apne hi ghar mein gum tha

har qadam par shajar-e-shauq ke sae the magar

dam-e-fursat bhi to main KHwab-e-safar mein gum tha

bas-ki ye raaz khula bhi to pas-e-marg-e-talash

wo meri aankhon mein main us ki nazar mein gum tha

har qadam par nai diwar thi mahrumi ki

hausla KHak uDane ka safar mein gum tha