tah-e-mazar kaun hai sar-e-mazar kaun tha

tah-e-mazār kaun hai sar-e-mazār kaun thā

jo qabr giilī kar gayā vo ashk-bār kaun thā

sabhī ne āshkār apne aap ko kiyā magar

numā.ishoñ kī aaḌ meñ vo parda-dār kaun thā

tamām shahr ġharq hai ġhubār hī ġhubār meñ

amīr-e-shahr ye batā vo ḳhāksār kaun thā

vo qaum hī ajiib thī the nīm-barahna sabhī

nadāmateñ thiiñ kis ke paas sharmsār kaun thā

musāfiroñ kā kyā huā ai nāḳhudā tū hī batā

bhañvar kī zad meñ kaun thā nadī ke paar kaun thā

thī be-hayā.īyoñ kī dhuum shahr-e-imtiyāz meñ

bigaḌ chuke samāj kā javāb-dār kaun thā

mirī qazā ke ba.ad shor-o-ġhul thā azhdahām meñ

mudāvā ġham kā kar gayā vo ġham-gusār kaun thā

jhalak rahī haiñ azmateñ 'navāz' us ke taaj meñ

jo taaj us ko de gayā vo tājdār kaun thā

tah-e-mazar kaun hai sar-e-mazar kaun tha

jo qabr gili kar gaya wo ashk-bar kaun tha

sabhi ne aashkar apne aap ko kiya magar

numaishon ki aaD mein wo parda-dar kaun tha

tamam shahr gharq hai ghubar hi ghubar mein

amir-e-shahr ye bata wo KHaksar kaun tha

wo qaum hi ajib thi the nim-barahna sabhi

nadamaten thin kis ke pas sharmsar kaun tha

musafiron ka kya hua ai naKHuda tu hi bata

bhanwar ki zad mein kaun tha nadi ke par kaun tha

thi be-hayaiyon ki dhum shahr-e-imtiyaz mein

bigaD chuke samaj ka jawab-dar kaun tha

meri qaza ke baad shor-o-ghul tha azhdaham mein

mudawa gham ka kar gaya wo gham-gusar kaun tha

jhalak rahi hain azmaten 'nawaz' us ke taj mein

jo taj us ko de gaya wo tajdar kaun tha