tai karunga ye andhera main akela kaise

tai karūñgā ye añdherā maiñ akelā kaise

mere hamrāh chalegā mirā saaya kaise

merī āñkhoñ kī chakā-chauñd batā saktī hai

jis ko dekhā hī na jaa.e use dekhā kaise

chāñdnī us se lipaT jaa.e havā.eñ kheleñ

koī rah saktā hai duniyā meñ achhūtā kaise

maiñ to us vaqt se Dartā huuñ ki vo pūchh na le

ye agar zabt kā aañsū hai to Tapkā kaise

yaad ke qasr haiñ ummīd kī qindīleñ haiñ

maiñ ne ābād kiye dard ke sahrā kaise

is liye sirf ḳhudā se hai taḳhātub merā

mere jazbāt ko samjhegā farishta kaise

zehn meñ nit-na.e but Dhaal ke ye dekhtā huuñ

but-kade ko vo banā letā hai kā'ba kaise

gar samundar hī se dariyāoñ kā rizq aatā hai

us ke siine meñ utar jaate haiñ dariyā kaise

kaise har saañs meñ aa jaatā huuñ fardā ke qarīb

phir bhī fardā mujhe de jaatā hai dhokā kaise

log jo ḳhāk-e-vatan bech ke khā jaate haiñ

apne hī qatl kā karte haiñ tamāshā kaise

tai karunga ye andhera main akela kaise

mere hamrah chalega mera saya kaise

meri aankhon ki chaka-chaund bata sakti hai

jis ko dekha hi na jae use dekha kaise

chandni us se lipaT jae hawaen khelen

koi rah sakta hai duniya mein achhuta kaise

main to us waqt se Darta hun ki wo puchh na le

ye agar zabt ka aansu hai to Tapka kaise

yaad ke qasr hain ummid ki qindilen hain

main ne aabaad kiye dard ke sahra kaise

is liye sirf KHuda se hai taKHatub mera

mere jazbaat ko samjhega farishta kaise

zehn mein nit-nae but Dhaal ke ye dekhta hun

but-kade ko wo bana leta hai ka'ba kaise

gar samundar hi se dariyaon ka rizq aata hai

us ke sine mein utar jate hain dariya kaise

kaise har sans mein aa jata hun farda ke qarib

phir bhi farda mujhe de jata hai dhoka kaise

log jo KHak-e-watan bech ke kha jate hain

apne hi qatl ka karte hain tamasha kaise