tai kiya is tarah safar tanha

tai kiyā is tarah safar tanhā

ek ham ek rahguzar tanhā

kaun hotā rafīq-e-tīra-shabī

dil jalāyā hai tā-sahar tanhā

ḳhairiyat pūchhne ko aa.ī hai

zindagī mujh ko dekh kar tanhā

āfat-e-jāñ hai vaz-e-ham-safarī

vaqt kī raah se guzar tanhā

dhaḌkanoñ kā bhī hai ajab andāz

dil kī vaadī hai kis qadar tanhā

na milā dard-āshnā koī

kaT gayā dard kā safar tanhā

dasht meñ apnī hī tajallī ke

jhilmilāyā kiyā qamar tanhā

sā.ateñ detī hī rahīñ āvāz

zindagī chal paḌī kidhar tanhā

qatl-gāh-e-vafā milī ḳhālī

'hurmat' aa.e hamīñ nazar tanhā

tai kiya is tarah safar tanha

ek hum ek rahguzar tanha

kaun hota rafiq-e-tira-shabi

dil jalaya hai ta-sahar tanha

KHairiyat puchhne ko aai hai

zindagi mujh ko dekh kar tanha

aafat-e-jaan hai waz-e-ham-safari

waqt ki rah se guzar tanha

dhaDkanon ka bhi hai ajab andaz

dil ki wadi hai kis qadar tanha

na mila dard-ashna koi

kaT gaya dard ka safar tanha

dasht mein apni hi tajalli ke

jhilmilaya kiya qamar tanha

saaten deti hi rahin aawaz

zindagi chal paDi kidhar tanha

qatl-gah-e-wafa mili KHali

'hurmat' aae hamin nazar tanha