tairega faza mein jo samundar na milega

tairegā fazā meñ jo samundar na milegā

dil sā bhī zamāne meñ shanāvar na milegā

sāhil se to andāza-e-tūfāñ bhī hai dushvār

tah meñ jo na utroge to gauhar na milegā

vābasta hai is bazm se hī ghar kā tasavvur

uTh jā.egī jab bazm to phir ghar na milegā

parvāz ḳhalāoñ meñ mubārak tumheñ lekin

ik baar bikhar kar to ye paikar na milegā

sar phoḌne vaale raheñ vallāh salāmat

kuchh din meñ ibādat ko bhī patthar na milegā

har zarra hai firdaus-e-nazar had-e-nazar tak

bedār na honā ki ye manzar na milegā

sairāb jo haiñ un kī havas aur baḌhī hai

is bhiiḌ meñ pyāsoñ ko samundar na milegā

tum lutf-e-mulāqāt ko ḳhvāboñ meñ basā lo

ye lamha masarrat kā bichhaḌ kar na milegā

har sher meñ iz.hār se ehsās ham-āġhosh

is daur meñ 'sāhir' sā suḳhan-var na milegā

tairega faza mein jo samundar na milega

dil sa bhi zamane mein shanawar na milega

sahil se to andaza-e-tufan bhi hai dushwar

tah mein jo na utroge to gauhar na milega

wabasta hai is bazm se hi ghar ka tasawwur

uTh jaegi jab bazm to phir ghar na milega

parwaz KHalaon mein mubarak tumhein lekin

ek bar bikhar kar to ye paikar na milega

sar phoDne wale rahen wallah salamat

kuchh din mein ibaadat ko bhi patthar na milega

har zarra hai firdaus-e-nazar had-e-nazar tak

bedar na hona ki ye manzar na milega

sairab jo hain un ki hawas aur baDhi hai

is bhiD mein pyason ko samundar na milega

tum lutf-e-mulaqat ko KHwabon mein basa lo

ye lamha masarrat ka bichhaD kar na milega

har sher mein izhaar se ehsas ham-aghosh

is daur mein 'sahir' sa suKHan-war na milega