tajdid-e-rah-o-rasm-e-mulaqat bhi hoti

tajdīd-e-rah-o-rasm-e-mulāqāt bhī hotī

vo sāmne aate to koī baat bhī hotī

be-tīr-o-kamāñ jis ne zamāne ko kiyā said

ai kaash hadaf us kā mirī zaat bhī hotī

ham phir bhī nikalte na sarāboñ ke bhañvar se

is dasht-e-tapīda meñ jo barsāt bhī hotī

mamnūn huuñ maiñ yuuñ bhī tirī marhamatoñ kā

dāman ke hī shāyāñ koī sauġhāt bhī hotī

ā.īna tirī sub.h-e-daraḳhshāñ ko dikhātā

ḳhurshīd-ba-kaf yūñhī mirī raat bhī hotī

is baat karam tak to rasā.ī thī yaqīnī

gar saath koī sham.a-e-munājāt bhī hotī

vo chāñd sā paikar kabhī āñgan meñ utartā

raushan ye mirī vādī-e-zulmāt bhī hotī

maiñ tere javābāt kā kuchh jā.eza letā

hāthoñ meñ agar fard-e-savālāt bhī hotī

ham karte shumār un kā farishta-nafasoñ meñ

mansūb jo kuchh un se karāmāt bhī hotī

phir qistoñ meñ 'nāsir' hameñ marnā nahīñ paḌtā

hāsil jo yahāñ thoḌī murā.āt bhī hotī

tajdid-e-rah-o-rasm-e-mulaqat bhi hoti

wo samne aate to koi baat bhi hoti

be-tir-o-kaman jis ne zamane ko kiya said

ai kash hadaf us ka meri zat bhi hoti

hum phir bhi nikalte na sarabon ke bhanwar se

is dasht-e-tapida mein jo barsat bhi hoti

mamnun hun main yun bhi teri marhamaton ka

daman ke hi shayan koi saughat bhi hoti

aaina teri subh-e-daraKHshan ko dikhata

KHurshid-ba-kaf yunhi meri raat bhi hoti

is baat karam tak to rasai thi yaqini

gar sath koi shama-e-munajat bhi hoti

wo chand sa paikar kabhi aangan mein utarta

raushan ye meri wadi-e-zulmat bhi hoti

main tere jawabaat ka kuchh jaeza leta

hathon mein agar fard-e-sawalat bhi hoti

hum karte shumar un ka farishta-nafason mein

mansub jo kuchh un se karamat bhi hoti

phir qiston mein 'nasir' hamein marna nahin paDta

hasil jo yahan thoDi muraat bhi hoti