takalluf hai murad-e-dil ka dil par bar ho jaana

takalluf hai murād-e-dil kā dil par baar ho jaanā

mohabbat kyā hai marne ke liye tayyār ho jaanā

na kaam aayā un aahoñ kā falak ke paar ho jaanā

mire sone se mushkil thā tirā bedār ho jaanā

nazar milte hī un se aa gayā saarā asar dil meñ

use aatā na thā pahle kabhī bīmār ho jaanā

vafā kā rāhbar hai tūda-e-ḳhākī kī jaan us ko

kamāñ-kash dil hai aage ik zarā hushiyār ho jaanā

ye tūfāñ ashk kā kam ho to samjhūñ Duub kar ubhrā

isī matlab ko sab kahte haiñ beḌā paar ho jaanā

tah-e-shamshīr jā-e-mardum-e-dīd hai dekh ai dil

yūñhī tū bhī usī din ke liye tayyār ho jaanā

zarā sī ik nigāh-e-ishq meñ āñkhoñ se girtā hai

bahut āsān hai insān kā be-kār ho jaanā

dil-e-sayyād se shikva karūñ kyā sahl hai is ko

'adū phūloñ kā ho kar ham-ziyān-e-ḳhār ho jaanā

huā jo kuchh huā mamnūn huuñ sahbā-e-ġhaflat kā

qafas meñ aa ke ab be-kār hai hushiyār ho jaanā

ye kaisī nā-tavānī hai ki dil mahsūs kartā hai

mire kāñdhoñ pe ḳhud mere hī sar kā baar ho jaanā

nazar ko ek jumbish aur de ai dekhne vaale

ishāre par hai in zaḳhmoñ kā dāmn-dār ho jaanā

baham haiñ be-hisī-o-his ki dil ko ḳhvāb aatā hai

kabhī shaq ho ke dar honā kabhī dīvār ho jaanā

tumhāre zo'm meñ rahrav kā raste se guzarnā hai

kisī chhūTe hue nāvak kā dil ke paar ho jaanā

tirā āvāza-e-husn-e-suḳhan achchhā nahīñ 'sāqib'

nazar paḌtī hai tujh par ik zarā hushyār ho jaanā

takalluf hai murad-e-dil ka dil par bar ho jaana

mohabbat kya hai marne ke liye tayyar ho jaana

na kaam aaya un aahon ka falak ke par ho jaana

mere sone se mushkil tha tera bedar ho jaana

nazar milte hi un se aa gaya sara asar dil mein

use aata na tha pahle kabhi bimar ho jaana

wafa ka rahbar hai tuda-e-KHaki ki jaan us ko

kaman-kash dil hai aage ek zara hushiyar ho jaana

ye tufan ashk ka kam ho to samjhun Dub kar ubhra

isi matlab ko sab kahte hain beDa par ho jaana

tah-e-shamshir ja-e-mardum-e-did hai dekh ai dil

yunhi tu bhi usi din ke liye tayyar ho jaana

zara si ek nigah-e-ishq mein aankhon se girta hai

bahut aasan hai insan ka be-kar ho jaana

dil-e-sayyaad se shikwa karun kya sahl hai is ko

'adu phulon ka ho kar ham-ziyan-e-KHar ho jaana

hua jo kuchh hua mamnun hun sahba-e-ghaflat ka

qafas mein aa ke ab be-kar hai hushiyar ho jaana

ye kaisi na-tawani hai ki dil mahsus karta hai

mere kandhon pe KHud mere hi sar ka bar ho jaana

nazar ko ek jumbish aur de ai dekhne wale

ishaare par hai in zaKHmon ka damn-dar ho jaana

baham hain be-hisi-o-his ki dil ko KHwab aata hai

kabhi shaq ho ke dar hona kabhi diwar ho jaana

tumhaare zo'm mein rahraw ka raste se guzarna hai

kisi chhuTe hue nawak ka dil ke par ho jaana

tera aawaza-e-husn-e-suKHan achchha nahin 'saqib'

nazar paDti hai tujh par ek zara hushyar ho jaana