taKHliq-e-be-sabaat ka zarra-nazir hun

taḳhlīq-e-be-sabāt kā zarra-nazīr huuñ

sāhil kī ret par koī likkhī lakīr huuñ

gardish hai zindagī mirī manzil-rasā nahīñ

masrūf‌‌‌‌-e-kār-koh-kan ik jū-e-shīr huuñ

māl-o-matā-o-sarvat-e-jāñ kuchh mirā nahīñ

haañ gardish-e-zamāñ ne dikhāyā faqīr huuñ

zindān-e-dahr hai mujhe ik qasr-e-dil-fareb

apnī hī ḳhvāhishāt kā aisā asiir huuñ

jitnā nikalnā chāhā thā utnā ulajh gayā

girdāb-e-zindagī kā maiñ yuuñ pā-e-gīr huuñ

mujh se jahāñ meñ aa.e aur aa kar chale ga.e

phir kyuuñ samajh rahā huuñ ki maiñ be-nazīr huuñ

achchhā huā ki yaad tū aayā hai āḳhirash

is be-ḳhudī meñ bhuul gayā thā 'haqīr' huuñ

taKHliq-e-be-sabaat ka zarra-nazir hun

sahil ki ret par koi likkhi lakir hun

gardish hai zindagi meri manzil-rasa nahin

masruf‌‌‌‌-e-kar-koh-kan ek ju-e-shir hun

mal-o-mata-o-sarwat-e-jaan kuchh mera nahin

han gardish-e-zaman ne dikhaya faqir hun

zindan-e-dahr hai mujhe ek qasr-e-dil-fareb

apni hi KHwahishat ka aisa asir hun

jitna nikalna chaha tha utna ulajh gaya

girdab-e-zindagi ka main yun pa-e-gir hun

mujh se jahan mein aae aur aa kar chale gae

phir kyun samajh raha hun ki main be-nazir hun

achchha hua ki yaad tu aaya hai aaKHirash

is be-KHudi mein bhul gaya tha 'haqir' hun