taKHliq ki duniya to asrar ki duniya hai

taḳhlīq kī duniyā to asrār kī duniyā hai

har fikr meñ jannat hai har lafz meñ sahrā hai

ā.īna-e-fitrat meñ har husn anokhā hai

dariyāoñ meñ sahrā hai sahrāoñ meñ dariyā hai

har hādsa-e-nau kī likkhī hai ḳhabar is par

insān kā chehra kyā aḳhbār kā chehra hai

is talḳh haqīqat ko taslīm kiyā jaa.e

maflūj taqāzoñ kā har zehn pe pahra hai

tafrīq kī la.anat ke qaa.il hue ham varna

shīsha bhī to patthar hai patthar bhī to shīsha hai

jazbāt kī akkāsī jo lafz na kar paa.e

vo dasht-e-ma.ānī kā maflūj parinda hai

is ahd-e-siyāsat kī thoḌī sī jhalak dekhī

bastī meñ ḳhamoshī hai marghaT pe tamāshā hai

insāñ ko 'zahīr' is kā ehsās nahīñ shāyad

phūloñ kī rifāqat meñ kāñTā bhī mahaktā hai

taKHliq ki duniya to asrar ki duniya hai

har fikr mein jannat hai har lafz mein sahra hai

aaina-e-fitrat mein har husn anokha hai

dariyaon mein sahra hai sahraon mein dariya hai

har hadsa-e-nau ki likkhi hai KHabar is par

insan ka chehra kya aKHbar ka chehra hai

is talKH haqiqat ko taslim kiya jae

mafluj taqazon ka har zehn pe pahra hai

tafriq ki lanat ke qail hue hum warna

shisha bhi to patthar hai patthar bhi to shisha hai

jazbaat ki akkasi jo lafz na kar pae

wo dasht-e-maani ka mafluj parinda hai

is ahd-e-siyasat ki thoDi si jhalak dekhi

basti mein KHamoshi hai marghaT pe tamasha hai

insan ko 'zahir' is ka ehsas nahin shayad

phulon ki rifaqat mein kanTa bhi mahakta hai