taKHta-e-dar pe lai nigah-e-naz mujhe

taḳhta-e-dār pe laa.ī nigah-e-nāz mujhe

'ishq ne maan liyā sāhib-e-e'zāz mujhe

jhuum ke ġhuncha-o-gul jab bhī hañsā karte haiñ

tere jaise hī lagā karte haiñ andāz mujhe

ik qadam baḌhtā huuñ aur phir se palaT aatā huuñ

kahīñ jaane nahīñ detī tirī āvāz mujhe

qaid se kyā mujhe sayyād rihā.ī detā

uḌ gayā le ke mirā jazba-e-parvāz mujhe

rūkhī sūkhī pe qanā'at hai qanā'at kī qasam

maiñ ne kab chāhā mile dā’vat-e-shīrāz mujhe

is na.e daur ke insānoñ kī ġhairat ko salām

ḳhud daġhābāz samajhte haiñ daġhābāz mujhe

sab ke sab mujh ko banā dete haiñ pāgal 'tābish'

kabhī āñkheñ kabhī gesū kabhī andāz mujhe

taKHta-e-dar pe lai nigah-e-naz mujhe

'ishq ne man liya sahib-e-e'zaz mujhe

jhum ke ghuncha-o-gul jab bhi hansa karte hain

tere jaise hi laga karte hain andaz mujhe

ek qadam baDhta hun aur phir se palaT aata hun

kahin jaane nahin deti teri aawaz mujhe

qaid se kya mujhe sayyaad rihai deta

uD gaya le ke mera jazba-e-parwaz mujhe

rukhi sukhi pe qana'at hai qana'at ki qasam

main ne kab chaha mile da’wat-e-shiraaz mujhe

is nae daur ke insanon ki ghairat ko salam

KHud daghabaz samajhte hain daghabaz mujhe

sab ke sab mujh ko bana dete hain pagal 'tabish'

kabhi aankhen kabhi gesu kabhi andaz mujhe