taklif-e-iltifat-e-gurezan kabhi kabhi

taklīf-e-iltifāt-e-gurezāñ kabhī kabhī

yuuñ bhī huī hai pursish-e-pinhāñ kabhī kabhī

merāj-e-dīd jalva-e-jānāñ kabhī kabhī

ham bhī rahe haiñ nāzish-e-daurāñ kabhī kabhī

ye aur baat rabt-e-musalsal na kah sakeñ

chūmā hai ham ne dāman-e-jānāñ kabhī kabhī

naqsh-e-ḳhayāl aap kī tasvīr ban gayā

ye mo.ajiza huā hai numāyāñ kabhī kabhī

bandī-navāzī-e-karam-e-gāh gaah se

ham bhī the kā.ināt-badāmāñ kabhī kabhī

laġhzish kī baat virsa-e-ādam kī baat hai

khātā hai Thokareñ dil-e-insāñ kabhī kabhī

karvaT badal ga.ī hai tirī vaza-e-iltifāt

dekhā hai ye bhī ḳhvāb-e-pareshāñ kabhī kabhī

ye sar-kashī ke naam se mansūb hī sahī

hotā hai dil bhī sar-ba-garebāñ kabhī kabhī

aksar nashāt-e-sair-e-gulistān-e-be-ḳhizāñ

andāza-e-fareb-e-bahārāñ kabhī kabhī

mere laboñ pe mauj-e-tabassum ke bāvajūd

ġham ho gayā hai ruḳh se numāyāñ kabhī kabhī

kahnā paḌā hai jalva-e-sad-rang rokiye

nazreñ huī haiñ itnī pareshāñ kabhī kabhī

ḳhud apne ās-pās añdheroñ ko dekh kar

ghabrā uThī hai sub.h-e-bahārāñ kabhī kabhī

dāman bachā ke ham to guzar jaa.eñ ai 'urūj'

ḳhud chheḌtī hai gardish-e-daurāñ kabhī kabhī

taklif-e-iltifat-e-gurezan kabhi kabhi

yun bhi hui hai pursish-e-pinhan kabhi kabhi

meraj-e-did jalwa-e-jaanan kabhi kabhi

hum bhi rahe hain nazish-e-dauran kabhi kabhi

ye aur baat rabt-e-musalsal na kah saken

chuma hai hum ne daman-e-jaanan kabhi kabhi

naqsh-e-KHayal aap ki taswir ban gaya

ye moajiza hua hai numayan kabhi kabhi

bandi-nawazi-e-karam-e-gah gah se

hum bhi the kainat-badaman kabhi kabhi

laghzish ki baat wirsa-e-adam ki baat hai

khata hai Thokaren dil-e-insan kabhi kabhi

karwaT badal gai hai teri waza-e-iltifat

dekha hai ye bhi KHwab-e-pareshan kabhi kabhi

ye sar-kashi ke nam se mansub hi sahi

hota hai dil bhi sar-ba-gareban kabhi kabhi

aksar nashat-e-sair-e-gulistan-e-be-KHizan

andaza-e-fareb-e-bahaaran kabhi kabhi

mere labon pe mauj-e-tabassum ke bawajud

gham ho gaya hai ruKH se numayan kabhi kabhi

kahna paDa hai jalwa-e-sad-rang rokiye

nazren hui hain itni pareshan kabhi kabhi

KHud apne aas-pas andheron ko dekh kar

ghabra uThi hai subh-e-bahaaran kabhi kabhi

daman bacha ke hum to guzar jaen ai 'uruj'

KHud chheDti hai gardish-e-dauran kabhi kabhi