Takra rahe hain mauj-e-fareb-e-jahan se hum

Takrā rahe haiñ mauj-e-fareb-e-jahāñ se ham

aise meñ tujh ko laa.eñ javānī kahāñ se ham

marham ke bāvajūd bhī bharte nahīñ haiñ zaḳhm

vāqif haiñ nashtar-e-karam-e-dostāñ se ham

har lafz ek Tiis hai har jumla ik fuġhāñ

afsāna-e-hayāt sunā.eñ kahāñ se ham

allah re be-ḳhudī ki hameñ pūchhnā paḌā

jaa.eñ kidhar ko aa.e haiñ yaaro kahāñ se ham

ab dekhnī haiñ ahl-e-karam kī navāzisheñ

uTh to ga.e haiñ mahfil-e-pīr-e-muġhāñ se ham

dil hogā aur mātam-e-barbādī-e-chaman

uljhe na aaj agar ravish-e-bāġhbāñ se ham

'bismil' ye ittifāq bhī kitnā 'ajīb hai

pahuñche haiñ har yaqīn kī tah tak gumāñ se ham

Takra rahe hain mauj-e-fareb-e-jahan se hum

aise mein tujh ko laen jawani kahan se hum

marham ke bawajud bhi bharte nahin hain zaKHm

waqif hain nashtar-e-karam-e-dostan se hum

har lafz ek Tis hai har jumla ek fughan

afsana-e-hayat sunaen kahan se hum

allah re be-KHudi ki hamein puchhna paDa

jaen kidhar ko aae hain yaro kahan se hum

ab dekhni hain ahl-e-karam ki nawazishen

uTh to gae hain mahfil-e-pir-e-mughan se hum

dil hoga aur matam-e-barbaadi-e-chaman

uljhe na aaj agar rawish-e-baghban se hum

'bismil' ye ittifaq bhi kitna 'ajib hai

pahunche hain har yaqin ki tah tak guman se hum