ٹکرا رہے ہیں موج فریب جہاں سے ہم

ٹکرا رہے ہیں موج فریب جہاں سے ہم

ایسے میں تجھ کو لائیں جوانی کہاں سے ہم

مرہم کے باوجود بھی بھرتے نہیں ہیں زخم

واقف ہیں نشتر کرم دوستاں سے ہم

ہر لفظ ایک ٹیس ہے ہر جملہ اک فغاں

افسانۂ حیات سنائیں کہاں سے ہم

اللہ رے بے خودی کہ ہمیں پوچھنا پڑا

جائیں کدھر کو آئے ہیں یارو کہاں سے ہم

اب دیکھنی ہیں اہل کرم کی نوازشیں

اٹھ تو گئے ہیں محفل پیر مغاں سے ہم

دل ہوگا اور ماتم بربادیٔ چمن

الجھے نہ آج اگر روش باغباں سے ہم

بسملؔ یہ اتفاق بھی کتنا عجیب ہے

پہنچے ہیں ہر یقین کی تہہ تک گماں سے ہم