ٹکرانے سے جو آگ اٹھی تھی اسی کا ہو

ٹکرانے سے جو آگ اٹھی تھی اسی کا ہو

شاید کہیں پہ نقش تری روشنی کا ہو

لاکھوں طرح کی زندگی آباد ہے یہاں

ہر مسئلہ ضروری نہیں آدمی کا ہو

ناگاہ اس بدن سے لپٹتا ہوں بار بار

شاید یہی علاج مری بیکلی کا ہو

ہر چیز سے زیادہ ہے نسبت کی اہمیت

پتھر بھی کوئی مارے تو اس کی گلی کا ہو

شرکت ضروری ہوتی ہے تکمیل کے لیے

میں بھی کسی کا ہو گیا تو بھی کسی کا ہو

ساقی گری تو آتی ہے سب کو بقدر ظرف

ہونا ہے امتحان تو پھر دلبری کا ہو