Takrane se jo aag uThi thi usi ka ho

Takrāne se jo aag uThī thī usī kā ho

shāyad kahīñ pe naqsh tirī raushnī kā ho

lākhoñ tarah kī zindagī ābād hai yahāñ

har mas.ala zarūrī nahīñ aadmī kā ho

nāgāh us badan se lipaTtā huuñ baar baar

shāyad yahī ilaaj mirī bekalī kā ho

har chiiz se ziyāda hai nisbat kī ahmiyat

patthar bhī koī maare to us kī galī kā ho

shirkat zarūrī hotī hai takmīl ke liye

maiñ bhī kisī kā ho gayā tū bhī kisī kā ho

sāqī-garī to aatī hai sab ko ba-qadr-e-zarf

honā hai imtihān to phir dilbarī kā ho

Takrane se jo aag uThi thi usi ka ho

shayad kahin pe naqsh teri raushni ka ho

lakhon tarah ki zindagi aabaad hai yahan

har masala zaruri nahin aadmi ka ho

nagah us badan se lipaTta hun bar bar

shayad yahi ilaj meri bekali ka ho

har chiz se ziyaada hai nisbat ki ahmiyat

patthar bhi koi mare to us ki gali ka ho

shirkat zaruri hoti hai takmil ke liye

main bhi kisi ka ho gaya tu bhi kisi ka ho

saqi-gari to aati hai sab ko ba-qadr-e-zarf

hona hai imtihan to phir dilbari ka ho