تلاش یار میں نکلے تو یاد گھر نہ رہا

تلاش یار میں نکلے تو یاد گھر نہ رہا

وہ شوق دید کہ اندازۂ سفر نہ رہا

ہوئیں بشارتیں ہجرت کی جب پرندوں کو

تو ان کے دل میں بدلتی رتوں کا ڈر نہ رہا

ستم ظریفئ تہذیب نو ترے قرباں

کوئی بھی شخص زمانے میں معتبر نہ رہا

فلک سے اترے گا ہم پر تمازتوں کا عذاب

اگر زمیں پہ کہیں سایۂ شجر نہ رہا

انہیں کے پاس ہیں اب بھی وسائل تعمیر

جنہیں سلیقۂ تزئین بام و در نہ رہا

اسدؔ کا اور زمانہ تھا اب تو مجنوں پر

کسی نے سنگ اٹھایا تو یاد سر نہ رہا

اسی خدا سے ہے امید مغفرت اے سوزؔ

کہ جس کا خوف ترے دل میں عمر بھر نہ رہا