talash jis nur ki hai tujhko chhupa hai tere badan ke andar

talāsh jis nuur kī hai tujh ko chhupā hai tere badan ke andar

zuhūr-e-ālam huā usī se vo hai har ik jān-o-tan ke andar

tujhe ye be-sarfa jadd-o-kad hai kashākashī meñ bhī shadd-o-mad hai

nafas kī tujh ko agar madad hai safar hai is jā vatan ke andar

tujhe vahāñ se gurez o ram hai talāsh ab āhū-e-haram hai

chalā hai vo raah jo bharam hai, hai mushk-e-nāfa ḳhutan ke andar

jahāñ meñ saarā hai nuur terā har ek shai meñ zuhūr terā

magar taḳhayyul hai duur terā paḌā hai bait-ul-huzan ke andar

tū hī muhaqqiq tū hī mujaddid banā hai tū aap hī muqallid

tū rasm-o-rah kā huā muqayyad phañsā hai ḳhud mā-o-man ke andar

qadīm vīrāñ-kada hai hastī samajh ise hai fanā kī bastī

ye terī himmat kī sab hai pastī zubūñ hai dahr-e-kuhan ke andar

ajiib ahmaq hai aur saada savār ho kar huā piyāda

kidhar chalā ye nahīñ hai jaada tū kyuuñ bhaTaktā hai ban ke andar

ye ātish-e-ishq kī hai jiddat ki dil meñ paidā huī hai riqqat

ye soz-e-ġham kī milī hai lazzat maza hai dil kī jalan ke andar

huā hai mast-e-sharāb-e-gulgūñ akaḌ rahā hai vo sarv-e-mauzūñ

dikhā ke ham ko ye jām-e-vāzūñ ḳhajil kiyā anjuman ke andar

huā hai sarshār vahm-e-'sāqī' tujhe nahīñ shauq-e-vasl baaqī

havā-e-duniyā kā hai mirāqī paḌā hai āvāgavan ke andar

talash jis nur ki hai tujh ko chhupa hai tere badan ke andar

zuhur-e-alam hua usi se wo hai har ek jaan-o-tan ke andar

tujhe ye be-sarfa jadd-o-kad hai kashakashi mein bhi shadd-o-mad hai

nafas ki tujh ko agar madad hai safar hai is ja watan ke andar

tujhe wahan se gurez o ram hai talash ab aahu-e-haram hai

chala hai wo rah jo bharam hai, hai mushk-e-nafa KHutan ke andar

jahan mein sara hai nur tera har ek shai mein zuhur tera

magar taKHayyul hai dur tera paDa hai bait-ul-huzan ke andar

tu hi muhaqqiq tu hi mujaddid bana hai tu aap hi muqallid

tu rasm-o-rah ka hua muqayyad phansa hai KHud ma-o-man ke andar

qadim viran-kada hai hasti samajh ise hai fana ki basti

ye teri himmat ki sab hai pasti zubun hai dahr-e-kuhan ke andar

ajib ahmaq hai aur sada sawar ho kar hua piyaada

kidhar chala ye nahin hai jada tu kyun bhaTakta hai ban ke andar

ye aatish-e-ishq ki hai jiddat ki dil mein paida hui hai riqqat

ye soz-e-gham ki mili hai lazzat maza hai dil ki jalan ke andar

hua hai mast-e-sharab-e-gulgun akaD raha hai wo sarw-e-mauzun

dikha ke hum ko ye jam-e-wazun KHajil kiya anjuman ke andar

hua hai sarshaar wahm-e-'saqi' tujhe nahin shauq-e-wasl baqi

hawa-e-duniya ka hai miraqi paDa hai aawagawan ke andar