talash phir koi khoi si rahguzar mein thi

talāsh phir koī khoī sī rahguzār meñ thī

phir aaj ik shaam sub.h ke intizār meñ thī

vajūd garche havāoñ kī zad pe thā hamārā

charāġh kī lau hatheliyoñ ke hisār meñ thī

nigāh ke saare iḳhtiyārāt salb se the

kashish na jaane vo kaun sī ḳhārzār meñ thī

umiid se thiiñ yahāñ vahāñ tak tamām āñkheñ

talab barahna visāl ke kār-zār meñ thī

use musavvir ne raushnī se badan kiyā hai

añdherī ḳhushbū jo dīda-e-ḳhvāb-kār meñ thī

vaqār qaa.em na rakh sakī dūsre badan par

anā bahut mo'atabar thī jab ḳhāksār meñ thī

ḳhayāl 'parvez' dā.era band ho gayā thā

yaqīn sī koī chiiz qurb-o-javār meñ thī

talash phir koi khoi si rahguzar mein thi

phir aaj ek sham subh ke intizar mein thi

wajud garche hawaon ki zad pe tha hamara

charagh ki lau hatheliyon ke hisar mein thi

nigah ke sare iKHtiyaraat salb se the

kashish na jaane wo kaun si KHarzar mein thi

umid se thin yahan wahan tak tamam aankhen

talab barahna visal ke kar-zar mein thi

use musawwir ne raushni se badan kiya hai

andheri KHushbu jo dida-e-KHwab-kar mein thi

waqar qaem na rakh saki dusre badan par

ana bahut mo'atabar thi jab KHaksar mein thi

KHayal 'parwez' daera band ho gaya tha

yaqin si koi chiz qurb-o-jawar mein thi