talab aasudgi ki arsa-e-duniya mein rakhte hain

talab āsūdgī kī arsa-e-duniyā meñ rakhte haiñ

umīd-e-fasl-e-gul hai aur qadam sahrā meñ rakhte haiñ

hue haiñ is qadar mānūs ham paimān-e-fardā se

ki ab dil kā safīna hijr ke dariyā meñ rakhte haiñ

bashar ko dekhiye bā-īñ-hama sāhil pe martā hai

hubāb apnā asāsa sail-e-be-parvā meñ rakhte haiñ

hamāre paas koī gardish-e-daurāñ nahīñ aatī

ham apnī umr-e-fānī sāġhar-o-mīnā meñ rakhte haiñ

hameñ har gaam par miltā rahā ezāz-e-mahrūmī

vaqār apnā bahut ham dīda-e-duniā meñ rakhte haiñ

umīdoñ ke khañDar māyūsiyoñ ke dam-ba-ḳhud saa.e

baḌī hī raunaqeñ ham is dil-e-tanhā meñ rakhte haiñ

hamāre daur ke insān ḳhud apnī hī zid nikle

talab maazī kī hotī hai qadam fardā meñ rakhte haiñ

'zahīr' in dil-zadoñ kī azmateñ dekho ye parvāne

charāġh-e-ishq raushan vaadī o sahrā meñ rakhte haiñ

talab aasudgi ki arsa-e-duniya mein rakhte hain

umid-e-fasl-e-gul hai aur qadam sahra mein rakhte hain

hue hain is qadar manus hum paiman-e-farda se

ki ab dil ka safina hijr ke dariya mein rakhte hain

bashar ko dekhiye ba-in-hama sahil pe marta hai

hubab apna asasa sail-e-be-parwa mein rakhte hain

hamare pas koi gardish-e-dauran nahin aati

hum apni umr-e-fani saghar-o-mina mein rakhte hain

hamein har gam par milta raha ezaz-e-mahrumi

waqar apna bahut hum dida-e-dunia mein rakhte hain

umidon ke khanDar mayusiyon ke dam-ba-KHud sae

baDi hi raunaqen hum is dil-e-tanha mein rakhte hain

hamare daur ke insan KHud apni hi zid nikle

talab mazi ki hoti hai qadam farda mein rakhte hain

'zahir' in dil-zadon ki azmaten dekho ye parwane

charagh-e-ishq raushan wadi o sahra mein rakhte hain